आजकालच्या धकाधकीच्या जीवनात खूपच अनिश्चितता आली आहे. कधी काय होईल हे सांगता येत नाही. खचाखच रहदारी असलेल्या रस्त्यावरून जाताना सर्व थरातली माणसे जीव मुठीत घेऊन जातात. मग ती पायी चालणारी माणसे असोत, सायकल-स्कूटर-मोटर सायकल वरची माणसे असोत, की कार मधील माणसे, आदल्या दिवशीपर्यन्त निरोगी जीवन जगणारा तरूण माणूस अपघातात दगावल्याची बातमी येते आणि कुटुंबात शोककळा पसरते. लोकांना खरं तर चालायला आवडते, परंतु आजकाल रस्त्याच्या कडेने चालणे सुद्धा तितकेसे सोपे नसते. भारतातल्या कुटुंब पद्धतीत ब-याचदा एका माणसाच्या उत्पन्नावर घर चालत असते. आणि असा कमावता माणूस जर अपघातात गेला तर कुटुंब एकटे पडते. आणि न कमावणारा माणूस दगावला तरीही भावनेत गुंतलेले कुटुंब तुटते. मानसिक वेदनेतून जाते. ह्यासाठी प्रत्येक व्यक्तीचा विमा उतरवणे ही खूप महत्त्वाची बाब ठरली आहे. भारतात विमा (इन्शुरन्स) ह्या विषयावर काम करणा-या दोन मुख्य कंपन्या: द लाईफ इन्शुरन्स कंपनी ऑफ इंडिया (एल.आय.सी.) द जनरल इन्शुरन्स कंपनी ऑफ इंडिया (जी.आय.सी.) एल.आय.सी. ही प्रसिद्ध कंपनी मनुष्याच्या जीवनविम्या विषयी काम करते, तर जी.आय.सी. ही कंपनी वीम्याचे इतर पैलू हाताळते. जी.आय.सी. कंपनीच्या चार उप-शाखा पुढील प्रमाणे: द न्यू इंडिया ऍश्युरन्स कंपनी लिमिटेड द नॅशनल इन्शुरन्स कंपनी लिमिटेड द ओरिएन्टल इन्शुरन्स कंपनी लिमिटेड द युनायटेड इन्शुरन्स कंपनी लिमिटेड ह्या चार कंपन्यांमधे अनेक प्रकारचे विमे उतरवले जातात. व्यक्तिगत दुर्घटना विमा आणि आरोग्य विमा हे त्याचे मुख्य उपप्रकार. त्यामधे घरफोडी, घरातील फर्निचर/वस्तू, प्रवासी विमा, समुद्री पकड, विमान प्रवास विमा, वाहन विमा, आजरपण/ऑपरेशन ह्या साठी विमा उतरवला जातो. अशा त-हेने विमा हा आता माणसाच्या जीवनाचा अविभाज्य भाग बनून गेला आहे.