Print
Hits: 2866

सकाळ वृत्तसेवा
२१ फ़ेबुवारी २०११
ससून रुग्णालय, भारत

आणि ससून रुग्णालय झाले चकाचक

अनिरुद्ध उपासना केंद्राच्या स्वयंसेवकांनी ससून रुग्णालयाचा कानाकोपरा रविवारी साफ केला. आपली ओळख विसरून स्वयंसेवक सफाईच्या कामात दंग झाले होते.

पुणे - कोणी डॉक्‍टर, कोणी कुशल सर्जन, कोणी अभियंता, कोणी प्राध्यापक, तर कोणी उच्चपदस्थ सरकारी अधिकारी; पण सर्वांनी हातात झाडू घेतले होते. एकवेळ स्वच्छता कर्मचारी जी घाण साफ करणार नाही, ती साफ करण्याचे काम मनापासून सुरू होते. आपल्या पदाचा, व्यवसायाचाही त्यांना विसर पडला होता. चार तासांच्या श्रमदानानंतर रुग्णालयाचे तीन मजले चकाचक झाल्यावरच त्यांनी झाडू खाली ठेवले.

ससून रुग्णालयातील गेल्या चार वर्षांपासून मोफत सेवा देणाऱ्या अनिरुद्ध उपासना केंद्राच्या स्वयंसेवकांनी रविवारी हा उपक्रम राबविला. इतर लोक "वीकएंड'ची मजा लुटत असताना उपासना केंद्राचे सुमारे सव्वाशे महिला व पुरुष कार्यकर्ते सफाईच्या कामात गुंतले होते. दर तीन महिन्यांनी अशी स्वच्छता मोहीम हाती घेण्यात येते. सफाईपूर्वी रुग्णालयाची पाहणी केली जाते. कोठे व काय सफाईची गरज आहे, याचा आढावा घेऊन आवश्‍यक ते साहित्य आणले जाते. वेगवेगळी पथके करून त्यांच्यावर जबाबदाऱ्या सोपविल्या जातात. जिन्यात साठलेला कचरा, पिचकाऱ्यांनी रंगलेले खांब, छताला चिकटलेली जळमटे, तंबाखू साठलेल्या खिडक्‍या पाणी मारून स्वच्छ धुतल्या जातात. रुग्ण आणि त्यांचे नातेवाईक या उपक्रमाकडे कुतूहलाने पाहत होते. कार्यकर्ते मात्र सेवा या भावनेतूनच काम करीत होते. विशेष म्हणजे, असे काम केले की लोकांना प्रसिद्ध हवी असते. आमची नावे छापा म्हणून पत्रकारांना विनंती केली जाते. येथे मात्र उलटाच प्रकार पाहायला मिळाला, आमची नावे छापू नका, अशीच सर्वजण विनंती करीत होते.

त्यांना काय दंड करणार?
मुळात घाणच होऊ नये, यासाठी दंडात्मक कारवाईच्या कडक अंमलबजावणीचा पर्याय आहे; मात्र ज्यांना उपचारासाठीही पैसे नाहीत, असे रुग्ण येथे येतात. ते काय दंड भरणार? दोनवेळच्या जेवणाची भ्रांत असलेले आणि आरोग्याची चिंता घेऊन येथे आलेल्या या रुग्णांचे प्रबोधन तरी कसे करणार? अशी भूमिका या स्वयंसेवकांची आहे. त्यामुळे प्रत्यक्ष सफाईच्या कामावरच जादा लक्ष केंद्रित करण्यात येत असल्याचे सांगण्यात आले.

Disclaimer: The news story on this page is the copyright of the cited publication. This has been reproduced here for visitors to review, comment on and discuss. This is in keeping with the principle of ‘Fair dealing’ or ‘Fair use’. Visitors may click on the publication name, in the news story, to visit the original article as it appears on the publication’s website.